Myndlist í Føroyum ( 10 )
KVF

Hóast tey flestu føroysku listafólkini arbeiða við einum abstraktum myndamáli, so benda formar og rørslur í málningum og myndum annars javnan aftur á náttúruna. Astrid Andreasen úr Vestmanna arbeiðir við ull. Í sínum teppum skapar hon mangan eitt afturljóð av náttúruni. Jóna Rasmussen úr Havn roynir nýggjar leiðir í sínum grafikki. Myndamál hennara er í stóran mun abstrakt. Sigrun Gunnarsdóttir á Eiði hevur funnið seg sjálva í einum ímyndandi stíli, har hennara trúarliga sinni fær andarúm. Kári Svensson er heldur onki undantak. Ofta fær áskoðarin eina kenslu av bjargalendi við klettum, rókum og drongum. Olivur við Neyst úr Klaksvík hevur hinvegin førkað seg nærri tí bygda umhvørvinum. Torbjørn Olsen úr Havn er tann málarin síðani Mikines, ið hevur gjørt mest við at mála andlitsmyndir
Áhugin fyri list kyknaði í 19. øld í sambandi við, at føroyingar fóru at geva náttúru síni gætur. Ein vaksandi tjóðskaparkensla bar í sær, at landslagið gjørdist listarligt myndevni, fyrst í skaldskapi - føðilandssongum, sum í dag eru fólkaogn - og síðani í myndlist. Eftir eitt tríati ára skeið við slóðbrótandi amatørvirksemi komu tey fyrstu professionellu listafólkini fram miðskeiðis í tríatiárunum. Eftir kríggið trinu fram mong nýggj gávurík listafólk, og hesi seinastu 50 árini kunnu vit staðfesta, at myndlistin er vorðin ein týðandi listagrein í Føroyum.