Myndlist í Føroyum ( 5 )
KVF

Ingálvur av Reyni og Ruth Smith eru tvey av fremstu føroysku listafólkunum. Ongin føroyskur listamaður hevur vegað gøtur og flutt mørk sum Ingálvur av Reyni. Fyri honum er tað at vera listamaður tað sama sum støðugt at leita nýggjar leiðir. Fyrst í 1960-árunum sýndi hann á fyrsta sinni fram málningar, ið kunnu rópast abstraktar kompositiónir. Ruth Smith var Føroya fremsti koloristur. Tey átta árini henni untist at arbeiða í Føroyum, málaði hon síni høvuðsverk. Hon var sera atfinningarsom móti sær sjálvari, og treyðugt sýndi hon fram. Listarliga stríð hennara var ein pínufull stremban eftir tí fullkomna
Áhugin fyri list kyknaði í 19. øld í sambandi við, at føroyingar fóru at geva náttúru síni gætur. Ein vaksandi tjóðskaparkensla bar í sær, at landslagið gjørdist listarligt myndevni, fyrst í skaldskapi - føðilandssongum, sum í dag eru fólkaogn - og síðani í myndlist. Eftir eitt tríati ára skeið við slóðbrótandi amatørvirksemi komu tey fyrstu professionellu listafólkini fram miðskeiðis í tríatiárunum. Eftir kríggið trinu fram mong nýggj gávurík listafólk, og hesi seinastu 50 árini kunnu vit staðfesta, at myndlistin er vorðin ein týðandi listagrein í Føroyum.